Koma honum úr pólitíkinni?

Ekki er ég nú þekktur fyrir að vera Mel Gibson í Conspiracy Theory, en væri nú ekki fyndið ef þetta er til að koma honum úr pólitíkinni. Eins fyndið og það er þá held ég að maður með jafn marga aðdáendur og Jón eigi pottþétt eftir að raka nógu mörgum atkvæðum til að sleppa inn.

En Jón er töffari og hefur staðið sig með sóma :)

Jón Gnarr nýtt leikskáld Borgarleikhússins

Skuggi orðinn 3ja mánaða

Við skötuhjúin erum búin að hafa það gott í sumar. Við erum búin að njóta veðurblíðunnar og skreppa í nokkrar útilegur og ferðalög. Skuggi litli er búinn að ferðast með okkur og það er alveg ótrúlegt hvað hann hegðar sér vel í tjaldútilegum og unir sér vel í náttúrunni. Hann fékk þó ekki að koma með mér í fyrstu veiðiferð sumarsins þar sem hann var aðeins of lítill í það núna í júní en við félagarnir komum heim með flottann afla að þeirri ferð lokinni. Hann þarf þó ekki að bíða lengi því veiðivatnaferð er á næstu grösum og hann skottast með okkur þangað.

Til að leyfa ykkur vinum og fjölskyldumeðlimum að fylgjast með honum á meðan hann er svona lítill og sætur að þá hef ég klippt saman stutt myndband þar sem hann er að leika sér og læra að synda. Hann stækkar ótrúlega hratt og maður veltir því fyrir sér hvert tíminn hverfur.

Hafið það gott í sumar.

Hólabergs Lovely Skuggi kemur í dag

Jæja þá og hananú.

Biðin er búin og ótrúlegt hvað svona langur tími er fljótur að líða og hvað þetta er samt stuttur tími sem var lengi að líða. Við fáum hvolpinn afhentann í dag og bíðum spennt eftir að geta farið að sækja hann. Hann kom í heimsókn tvisvar sinnum í þessari viku og fékk aðeins að skoða sig um og kynnast okkur (sjá myndir í myndaalbúminu http://helgi.blog.is/albums/skuggi/ ).

 

 

Hann er stór og sterkur Labrador rakki með svartan feld. Við gáfum honum nafnið Skuggi og skv. ættbókinni heitir hann Hólabergs Lovely Skuggi fullu nafni. Hann er þrælskemmtileg týpa og unir sér best úti í garði hjá okkur að skottast um. Hann er reyndar algjört búttað matargat og um leið og hann kemst í garðinn skellir hann sér á beit eins og rollurnar og fær sér smá gras.

Vinir og fjölskyldur bíða spennt eftir að fá að sjá hann og nokkrir fengu forskot á sæluna og kíktu við á meðan  heimsóknum stóð :)

Ég skora á ykkur að skoða myndirnar af litla töffaranum og fleiri munu bætast við í albúmið á næstunni. Svo er líka eitt skemmtilegt myndband frá því að Snúlla og Skuggi voru að kynnast.

Myndaalbúm:  http://helgi.blog.is/albums/skuggi/

 Video: http://helgi.blog.is/blog/helgi/video/8142/

Kominn tími til .... Nýjasta slúðrið !

Sælir kæru vinir, kunningjar og gestir.

Ég hef nú ekki snert við blogginu mínu í háa herrans tíð eða frá því í byrjun árs 2009. Það má því segja að bloggvísitalan hafi fallið með gengisvísitölunum á sama tíma og vísitala neysluverðs rauk uppúr öllu valdi. Ég er því hissa hvað ég er ennþá að fá margar heimsóknir inná hana þrátt fyrir skort á slúðri.

Nýjasta slúðrið !

Ég og Kittý höfum nú komið okkur fyrir í kózý íbúð sem við erum að leigja. Þetta er afar þægileg íbúð í alla staði og mjög góður andi í henni. Kisan okkar Snúlla litla er búin að vera eins og lítill landkönnuður síðan við fluttum og er nú þegar búin að kortleggja nýja heiminn og finna felustaði sem við skötuhjúin höfum ekki hugmynd um.

Við erum að fá okkur svartan flottan Labrador sem við fáum afhentan í júní. Litla krílið er bara tveggja vikna gamall og getur ekki beðið eftir að sækja gæsir og endur svo tugum skiptir. Við fengum að sjá hann fyrst í dag og myndir eru væntanlegar.

Stefnan er tekin á innanlandsferðalög hjá okkur í sumar og aldrei að vita nema einstaka veiðiferðir lumi inná milli. Við förum vestur á firði og vonandi náum við að rúnta eitthvað um hálendið ef SantaFe treystir sér í það.

En þetta er nú það helsta í bili og ég vona að þið haldið áfram að kíkja inn og endilega skutlið inn commentum til að skamma mig fyrir ritleysið eða bara til að kasta kveðju.

Helgi Þór

Láttu þér batna vinur !

Ég vona að drengurinn nái fullum bata fljótt og vel.

Þetta er stórhættuleg iðja að taka í sundur skotelda og fikta með þá. Maður gerði nú eitt eða tvö prakkarastrik sjálfur sem unglingur en ég get þó blessunarlega þakkað fyrir að hafa sloppið þótt maður hafi komist nálægt slysi oftar en einu sinni.

Sem unglingur hafa ekki allir náð að hemja spennufíknina og beina henni á öruggar brautir og því hvet ég foreldra til að fylgjast með börnum sínum í kringum áramót og flugeldasala til að fylgja settum reglum um aldurstakmörk !

 Börn og unglinar hafa ekkert með flugelda að gera og vítið svokallaða, sem var a.m.k. hér áður fyrr selt af einkaaðila en ekki slysavarnarfélögunum, hefur verið með frægari unglingabombunum a.m.k. frá því fyrir 10 árum þegar ég var 15 ára fiktari.

HERT EFTIRLIT OG AÐHALD FÆKKAR SLYSUM !

Óvíst um sjón eftir flugeldafikt

Efnahagslífið

Ákvað að henda inn tveimur teikningum sem ég gerði í gærkvöldi... virðast eiga vel við daginn í dag :)

 

 

 

Tívolíferð Efnahagslífsins !!!

Ja nú er það svart. Efnahagslífið okkar Íslendinga skellti sér í tívolí á meðan við almúgamenn og konur vinnum eins og hestar að borga aðgangseyrinn fyrir það. Gengið er í miðjum rússíbananum og krónan er í fallturninum á meðan embættismenn og fjármálaspekúlantar leika sér í klessubílunum. Fjölmiðlar fylgjast náið með málum og keppast um að birta fréttir um hætturnar sem leynast í tívolíinu.

ÉG TEK EKKI ÞÁTT Í SVARTSÝNI FJÖLMIÐLAMANNA OG ANNARA...

ÉG ER JÁKVÆÐUR OG ÞESSI KREPPA ER ÞAÐ BESTA SEM GAT KOMIÐ FYRIR MIG J

Ég hef ekki lengur efni á að reykja þannig að ég mun minnka hættuna á að fá krabbamein.

Ég þarf að spara svo skyndibiti og kók fer á hilluna og kílóin fjúka í burtu á mettíma

Ekki hef ég efni á djammi og leigubílakostnaði tvisvar í mánuði svo núna get ég kanski átt tíma með fjölskyldunni og notað þessi spil sem safna ryki inní skáp þótt að mér þyki þau skemmtileg.

Ekki er mikla yfirvinnu að fá þessa dagana svo ég hef loksins fengið tíma til að skrifa ljóðabókina sem ég hef haft í huga í langan tíma.

Matarverð er búið að snarhækka þannig að ég reyni jafnvel oftar að sinna tómstundargamaninu og skreppa til veiða og næla í steikur á matarborðið sem ég get fyllt frystirinn af.

Hver veit nema að ég þurfi að minnka við mig húsnæðið og þá gefst færi á að taka til í öllu þessu drasli sem ég hef sankað að mér og senda það í SORPU í eitt skipti fyrir öll.

Nú fæ ég loksins tækifæri til að sitja grannur og heill heilsu í sófanum heima með spil í hendi og handrit í hillunni nýbúinn að snæða góða gæsasteik í hreinni íbúð og ÞÁ FYRST get ég notið þess að vera einn af stoltum eigendum Glitnis banka.

Búist við tíðindum í dag

Furðulegheit á Vísir

Frétt um vítisengla og mynd af dagvaktinni ?

Moggamálfræðivísitalan lækkar

Reikningarnir vegna útgáfu Nyhedsavisen í Danmörku virðast fara hækkandi og fullyrðir Berlingske Tidende í dag, að tap á starfsemi blaðsins þau tvö ár sem það kom út sé komið í um 800 milljónir danskra króna, jafnvirði 13,1 milljarðs íslenskra króna. Af skuldunautum blaðsins mun tjón prentsmiðjunnar og danska skattsins vera mest.

Mér finnst því miður eins og að Morgunblaðið sé smátt og smátt að feykja sér af þeim stalli sem þeir höfðu í notkun á stafsetningu og íslensku málfari. Þetta sést m.a. í þessari frétt en þar hjó ég eftir því aðþeir kalla prentsmiðjuna og danska skattinn skuldunaut Nyhedsavisen í stað Lánardrottins. Ekki að þetta sé neitt háalvarlegt en þó er þetta talandi dæmi um margar fréttir sem ég hef orðið var við í spretthlaupinu á milli netmiðlanna. Er hraðinn að eyða út vönduðu málfari? Ætlum við að leyfa því að gerast?

Ég man það vel þegar ég sat íslenskutíma í grunnskóla hér á árum áður að hún Jóhanna Antonsdóttir, sem þá var umsjónarkennarinn minn, lagði ofuráherslu á góða stafsetningu og gott málfar. Hún miðaði við morgunblaðið og sagði okkur að sárasjaldan væri að finna villur þar (þetta var að sjálfsögðu vel fyrir tíð Fréttablaðsins). Hún bætti jafnframt við að helst væri að finna villur í auglýsingum í blaðinu sem kæmu utanfrá en nánast fáheyrt að það væri að finna í texta blaðsins og skoraði á okkur í leiðinni að leita uppi villur (mjög þroskandi áskorun). Þarna var ég ungur að árum en upplifði samt ákveðið stolt að fjölmiðill bæri þetta orðspor.

Ég skora á Moggamenn að halda áfram þeim gríðarlega góðu hlutum sem þeir hafa gert fyrir okkur öll s.l. tæpa öld og passa sig að sjá vandann nógu snemma til að geta lagað hann. T.d. fækka um eina kaffivél inni í netfréttasalnum ;)

Reikningarnir vegna Nyhedsavisen hækka

Stjórnvöld!!!!!! HVAR ERUÐ ÞIÐ

Hvað eigum við að kyngja þessu lengi þegjandi og hljóðalaust??? Er ekki einhver gjalda/skattalækkun sem getur komið fljótt í gegn sem neyðaraðstoð við heimilin í landinu?

Eldsneytisverð hækkar